Rober Garzia: Gitarra (Ortuella) Karmelo Aretxaga “Melows”: Baxua (Algorta) Xabi Oraa de Zumarraga: Bateria (Bilbo) Aitor Uriarte: Ahotsa (Oñati)

"Espazioaren eta une musikalaren manamenduak irauliz irudika ditzakegu doinu, harreman eta giro berriagoak. Ezagutzen duguna denean eskura dezakegun bakarra, gauza asko galtzen ari gara unez une. Musikak alda daitezke sorrarazten dituen bizitzak aldatu nahi baditu. Une edo memento trankilen ezak erne izan behar ditu gure indarrak. Gure ergelkeria ez da inoiz besteena baino handiago agertuko."

Guztia hain azkar doakigun gizarte honetan, askotan norberarentzako uneak ere beharrezkoak izan ohi dira. Ihesbideak musikarekin, lagun artean aurkitu ahal izan ditugu eta horrela islatu nahi izan dugu taldearen izenean:
UNE = Une Nare Eza (beste era batera: momentu trankilen falta).

Zaila da UNE-ren sortze data bakarra jartzea, musika talde hau denborarekin forma hartzen joan den talde bat bait da, jende ezberdina pasa da eta bakoitzak bere ukitua utzi du.
Hasiera baten Niöbe izenpean Rober eta Ruben gitarra-joleak (Bilbo inguruko talde ezberdinetan ibiliak: ADN, Apnea…) ardatz zirelarik, musika sortzen hasi ziren eta oso garbi zuten zer musikak betetzen zituen. Ondoren Xabi (Soda,…) bateriarekin eta Jaime (Psychophony, Afrika, Urgabe…) baxuarekin elkartu zitzaien. Azkenik, 2004 urteko uda ostean (2003 bukaeran kaleratu zen Sen-en azken diskoa) aspaldiko laguna zuen Xabi-ren bitartez Aitor (Latzen, Sen) ezagutu zuten. 2005 urterako taldea bere azken forma emanda zegoen eta hor nonbait jaio zen UNE.

2005 ko Otsailak 19 eta 20 bitartean Ondarroan Mikel eta Iñigo Santos anaiekin lau kantuz osaturiko maketa grabatu zuten eta horrez gero beraiek jardun dute Une-ren zuzeneko teknikari bezala.

Hainbat kontzertu eskaini ondoren, estudio handi batean denborari begira grabatu ordez, beste giro batean lasaiago ibiltzea bilatuz (badakizue… Une Nare Eza) 2005 bukaeran, Oihukaren eskutik, Santos anaiekin lehen diskoa grabatzen ziren Santos Records estudioetan. Diskoan Gaizka Peredak, taldekide bat gehiago izango balitz bezala (Sorkun, Etsaiak, Afrika, Bad Sound System… bezalako taldeentzat lanak eginak zituenak eta urte batzuk atzerago Jaimerekin Psychophony taldean kantatzen zuenak) programatutako soinuak landu zituen, kantuei kolore ezberdinak erantsiz.

Nahiz eta taldearen ardatza bere honetan segi, 2006 hasieran azken aldaketa batzuk izan ziren: Jaime baxujoleak, musika munduan profesionala izanda Madrilen beste abentura musikal bati ekin zion eta Ruben-ek Batzelonan soinu ikasketak burutzea erabaki zuen. Horrela UNE laukote bilakatu zen: Rober Garzia gitarrarekin, Xabi Oraa de Zumarraga baterian, eta Aitor Uriarte ahotsa. Baxuan, eskarmentudun musikari bat, Karmelo Aretxaga “Melows” elkartu zitzaien (Bulldozer, Zurkaitz, PiLT-en ordezko ibilia …).

2006 ko Apirilean diskoaren aurrerapena ezagutarazi zuten “Bihozkadak” kantuarekin eta Oihukari esker kantu honen bideo – klipa ere grabatu zuten Hernaniko inguruetan, lan honen arduradunak Aitor Ortiz de felipe, Juanma Aramendi, Izaskun Garmendia eta Unai Arana izan zirelarik. Ondoren, diskoko bigarren single bezala “Hustu nigan (penak)” aurkeztu zuten arren, bigarren bideo-kliperako “Hemen” kantua aukeratu zuten Bilboko Santana27 aretoan lagun askoren laguntzarekin egindako grabaziorako, muntaiaz “Melows” arduratu zen.

Oihukaren zigilupean urrian merkaturatu berri da hamaika kantuz osaturiko “Une Nare Eza” diskoa eta Juanma, Izaskun eta Unaiek egin duten CD Rom interaktibo bat ere gordetzen du gehigarri bezala. Diskoko diseinu lanak “Melows”ek egin ditu eta argazkiak Jessica del Campo argazkilariak.

“Hontza Produkzioak” lanean dihardu taldearen zuzenekoen plangintzari dagokionean.